2010年9月8日星期三

買燈記

屢聞推介,深圳買燈平。涉及電,我好驚會爆炸。不料連電工師傅給自己買燈都是北上,我就豁然不怕了。

上回買窗簾,發現今日深圳開價不像十多年前般離譜。從前陪媽媽來逛街,起碼減個半價。只要步出舖頭,阿姐一定追出,「好吧好吧,就×塊。」最誇張一次,是七年前在北京,朋友在秀水市場買毛筆,檔主開價百五,我以為是什麼珍奇異筆,結果十元八塊成交。

師傅介紹我逛田貝四路家合居。要大劈價嗎?知己知彼,慳番啖氣。師傅嘆道,講唔到呀,連想要粒後備燈泡仔都失敗……

我懷唔使講價的心情抵,一開,果然款多而新穎。但——點解咁貴?跟香港出名實惠的荃灣路德圍,差不多。店員報價,原來六折,還嘻嘻加句,你香港人鍾意講價嘛。我一直以為,是你內地人鍾意開剖客價咋喎,太有趣,完全相反的詮釋。真想知道他是說真還是隨便扯扯。

逛了半天,人手一抽戰利品。確是平一截,價還是有得講,間間都送我後備小燈泡。所以我有個結論:人善被人欺,師傅一定是太善良。

內地買燈,跟香港買最大分別是,不包安裝和穿珠。我一聽說要自己穿珠,捺不住興奮,「咁咪好有情趣囉!」登時在場男士都用奇異目光望向我,「有排穿……」結論二,小手作之於女士,是親力親為的美好;男士第一樣聯想到的,是好花時間。

是次購物之旅,還是買不齊,欠的竟是那最常見的睡房燈——屬意迷你水晶燈,香港店店皆有,挺精緻;在深圳,逛完數個燈飾商場,竟只兩盞!超巨型燈飾卻掛滿一店一街,他們的細款,已是香港小店的大款!

結論三,香港人住屋,細到無人有。

4 則留言:

  1. 買燈容易買細左, 唔同沙發容易買大左. 要留意呀.

    回覆刪除
  2. 謝謝你的意見 :)

    過幾天掛起就知size有冇買錯了

    回覆刪除
  3. hello, 八卦下, size 對不對呀?

    回覆刪除