如果成績差

這陣子，因為兩位師傅，我開始神遊太虛——假如有天，我有個仔會考止步無書讀，其實不壞喎。

事緣最近幾次剪髮，師傅都說不夠人洗頭。還未請夠人嗎？

「個個做兩做就嫌悶！讀過剪髮的，更當自己大師傅，不甘從低做起。」師傅其實只二三十，已在慨嘆「新一代」。他回想當年，個個都是這樣做學徒，捱出頭。只是如今，樂意先苦後甜的人少得多。

不約而同，裝修師傅亦如是慨嘆。「做泥水，600 元一天都無新人肯做，嫌辛苦。」（難怪裝修費咁貴！）師傅說，一次請來個小伙子，日日遲到早退，上班數天，薄責了幾句，自此，小伙子就人間蒸發，電話都沒接。不料有天，小伙子突然現身，劈頭一句： 「我唔係返工，我出糧咋！」原來那天，正是月尾，最準時就是這次了。

我看師傅，人家常抱怨裝修佬神龍見首不見尾，他卻每天笑瞇瞇，讓那四壁變靚，連星期日也開車取貨呀格價呀，還笑說「順路」。敬業樂業，比起那些終日玩弄財技不事生產的所謂專業人士，值得尊敬得多。他都是十幾歲入行，如今三十出頭，老套的「四仔」都儲齊了。不是用物質數算，只是說，曾經學業遜色的，做事勤力，養妻活兒，綽綽有餘，找對了興趣，更是樂在其中。

每到放榜季節，常聽人勸勉「會考只是人生小過程」，人在局中，恐怕不易明白。不如看看過來人例子。反正讀下去，吃力而難討好，倒不如疊埋心水，找門手藝：煮菜、做甜品、剪髮、美容、裝修……尤其如果半途而廢的人多，可能努力幾年，已脫穎而出呢。成績好，固可喜，不過工作幾年以後，誰理你考幾分。唯是自尊自重，工作以誠，才是不讓人看扁的關鍵，學歷高低都一樣。